“Müzəffər Ali Baş Komandan, Prezident İlham Əliyevin Şuşaya səfəri istər siyasi, istərsə də mənəvi baxımdan mühüm əhəmiyyət kəsb edir”.

Elitinfo.az xəbər verir ki, bunu Milli Məclisin deputatı Könül Nurullayeva bildirib.

“Biz 44 gündə dəmir yumruq hesabına qazandığımız qələbə sayəsində doğma, tarixi torpaqlarımıza qayıdırıq. Cənab Prezidentin Cıdır düzündə çıxışı zamanı qeyd etdiyi ən vacib məqamlardan biri son illər ərzində Azərbaycanda vətənpərvər, güclü, milli ruhda tərbiyə almış gənc nəslin yetişməsi ilə bağlıdır. Məhz 17 ildə cənab Prezidentin ölkəmizə rəhbərlik etdiyi müddətdə yetişən gənc nəsil bu torpaqları azad etdi. Təbii ki, böyük qələbəmizdə bütün nəsillərin payı var. Lakin cənab Prezidentin də qeyd etdiyi kimi, əsas vəzifəni gənc nəsil yerinə yetirdi. Çünki Azərbaycanda gənc nəsil vətənpərvərlik ruhunda yetişir. 30 il əvvəl işğal olunan ərazilərimizin azad olunması gənc nəslin də müəyyən etdiyi əsas vəzifələrdən biri idi. Xüsuilə Prezident İlham Əliyevin güclü bir lider kimi hər zaman dövlətçilik maraqlarını ən ali səviyyədə müdafiə etməsi gənc nəsil üçün əsl nümunə olub”, – o bildirib.

Deputat vurğulayıb ki, müharibədə iştirak edən hərbçilərimizin böyük əksəriyyətinin yaşı münaqişənin tarixindən azdır: “Yəni münaqişə alovlanan zaman dünyaya gəlməyən uşaqlar, bu tarixi sonradan öyrənərək qarşıya ali məqsəd qoyan gənclər bizim ərazi bütövlüyümüzün bərpasında iştirak etdilər. Öz qanları bahasına düşmənlə döyüş meydanında mübarizə apararaq, qələbəyə nail oldular. Çünki ərazi bütövlüyümüzün təmin olunması Azərbaycanda hər zaman dövlət siyasətinin mərkəzində olub. Məhz Prezident İlham Əliyevin 17 illik hakimiyyəti dövründə cəmiyyətdə mövcud olan həmrəylik daha da dərinləşdi. Uğurlu dövlət idarəçiliyi sayəsində Azərbaycan cəmiyyətində yaşından, etnik və dini mənsubiyyətindən asılı olmayaraq hər kəs vahid amal uğrunda, Prezident İlham Əliyevin də söylədiyi kimi, dəmir yumruq kimi birləşdi. Bundan sonra da biz xalq olaraq, gənc nəslin nümayəndələri olaraq qalib dövlətin təmsilçisi kimi heç kimdən çəkinməyən, milli maraqları müdafiə edən qalib liderin ətrafında daha sıx birləşəcəyik”.